Relativitat : de Galilei fins au graviton

E vaqui lo futur article d'escriéure : ara vau tornar sur caduna dei quatre interaccions fondamentalas, començant par l'interaccion gravitacional, puei l'electromanhetica, la fèbla, e fin finala la fòrta. Après aquelei quatre articles, pensi que ço qu'avetz legit dins lo premier article serà clar.

Comments

[lo_julien]

Pensi a un detalh de bòn notar : se li a tant de menas de raionament electromanhetics diferents es en fach perque lo foton a ges de massa. Per lei fòrça nuclearas la massa dei particulas diminua la mobilitat dei particulas, pòdan anar a una distança d'un òrdre de grandor determinada per la massa. Un foton, èu, pòu contunhar son camin fins qu'a la rescontra d'una autra particula embé la quala enteragir, quala que sigue la distança.

[Clapassier de NY]

Merces plan, compreni.

[lo_julien]

Oc, es verai qu'es un pauc luenh dau nivèu de licean que voliáu pilhar coma referença...
Bensai necessitariá un autre article, o bensai lo porai botar dins l'article sus l'electro-manhestisme e cambiar l'òrdre dei articles.

Un raionament electro-manhetic es una vibracion dei camps electrics e manhetics embé una frequença donada. Li a un molon de menas de raionament "diferents" segon aquela frequença. Si pòu tanben gachar puslèu la longor d'onda, qu'es lo camin fach per lo raionament durant una soleta oscillacion. Se la frequença es granda la longor d'onda es pichona, e reversament. Pòdes gachar aquò per exemple : http://fr.wikipedia.org/wiki/Fichier:Spectre_onde_electromagnetique.svg
Veses que ço qu'appelam lum corresponde ai vibracions que son energia es proche 1 electron-volt. Aquò es pas un còp d'asard : nòstre uelh es fach per receure las vibracions electromanheticas tipicas dei electrons "de la vida vidanta" (valent a dire de la quimia)

Per lo ròtle de l'equacion de Maxwell, la vitessa de la lum (en fach l'envèrs dau siéu carrat) es donada per lo produch de la permetivitat electrica (coma lo camp electric es influençat per una carga electrica) e de la permeabilitat manhetica (coma lo camp manhetic es influençat per un corrent electric).

[Clapassier de NY]

Osca per aqueste siti, linde e interessant.

Consi las equacions de Maxwell integran l'aviadessa de la lum? Consi la lum a una relacion amb l'electromagnetisme?