La sciença dins la lenga nòstra

Siti de vulgarisacion scientifica en occitan. Site de vulgarisation scientifique en occitan. Aqueu siti es mai o mens centrat sus la fisica dei particulas e l'interacion fòrta entre quarks, mai es dedicat a la fisica en generau.

02 septembre 2010

la FAQ dau sabre-laser

/archives/2010/12/12/19855797.html

arme_sabre_yoda_02Ara qu'ai parlat sciença-ficcion embé lei viatges a vitessa lum, vau continuar dins l'idèia embé lei sabres-laser.

Pòu vertadierament tuar un laser ?

En teoria òc : la lum laser absorbada per la pèu la caufa e la crema. Es ja utilisat per operar leis uelhs per exemple, e en TP disem  totjorn ai estudiant de faire mèfi ai uelhs quora manipulan de laser. Emai dins lei laboratis de recerca en optica li a de lasers que ti pòdon faire un pichon trauc dins la man se la daissas davanç unei segondas. Mais per trancar un braç d'un coup en una fraccion de segonda cau vertadièrament un laser dei poissantàs.

Pòu estre tan compact coma en Star Wars ?

Actualament lei laser embé aquelei poissanças son grandàs. Mais es pas una limitacion teorica, simplament tecnologica. Se savèm faire una batariá pron compacta (e si pòu totjorn maginar una batariá nucleara per exemple) e una cavitat laser pron solida lo principau es bòn.

Li a de dangier per lo Jedi ?

Se lo sabre-laser toca un objèct metalic o tota mena de miralh, li a un risque de refleccion dau laser, que si pòu tornar contra lo Jedi o un amic.

Sabre-laser o Fusiu-laser ?

La causida dau sabre per George Lucas es sobretot per l'efièch romantic et chivalierós. Mais en fach un fusiu-laser es ben mai naturau qu'un sabre laser. Lo principi dau laser es qu'es una lum coërenta (toei lei foton son de clones d'un unic foton de referença), ço que fa que le raion demòra coërent sus de distanças grandassas se li a ren per l'aresta. E l'atmosfèra es pas grand-cauva per l'arestar, fasem soventi fes d'expriment monte un laser percorre unei quilomètres. Aquò es fòrça interessant per un fusiu laser o un canon laser (d'alhors cresi que l'armada US a ja fach de canons lasers, per la defensa anti-missil), mais es un problèma per un sabre : lei risques de domatges collateraus son grandàs. Bensai sariá possible de reglar precisament la longor d'onda dau laser sus una banda d'absorption dau CO2 atmosferic (mais alora les sabres sarián aisidament neutralisats per una augmentacion dau taus de CO2 dins l'aire), mais lo mai probable es que caudriá que lo sabre-laser produsisse son atmosfèra pròpra d'un biais o d'un autre.

Doi sabres-laser si podrían crotzar coma de sabres vertadièr ?

Aqui es un problèma importanta. L'atmosfèra terrenca es un mitau opticalament linear, valent-a-dire que se doi laser si crotzan alora la lum dei doi sabres si va simplament adicionar en lo ponch de contact, sensa ges d'enteraccion. Adonc se li a ges d'enteraccion vòu dire qu'un sabre-laser pòu pas en arestar un autre : ren si va passar quora si crotzan e cada sabre-laser va contuhar son camin. Per resòuvre aquesto problèma, d'unei soslinhan que "sabre-laser" es pas una revirada exacta per l'inglés "lightsaber", e que George Lucas a pas jamai dich que lei sabres eran fach de lasers. Per exemple la citat dei scienças de la Vileta a fach una mòstra monte perpausa que lei "lightsaber" siágan de plasma confinat. Si podría tanben maginar un sistèma ibride : un plasma/gas confinat que son ròtle es simplament de guidar lo laser. E la causida dau plasma utilisat podría cambiar lo comportament dau laser en un molon de biais interessants.

Podriá arestar lei balas lo sabre ?

Lei balas òc, mais pas lei còps de fusiu-laser (per la mema rason que lo paragraf passat sus lei sabres que si crotzan). Per lei balas "convencionala" li pòu aver un efièch de pression de radiacion.

Lei moviments dau sabre farían de bruch ?

Es possible. Lo laser pòu un pauc caufar e ionisar l'aire a son entorn. Se la region caufada cambia li pòu aver una vibracion sonora.

 

Mandat per lo_julien a 17:04 - Brèvas - Comentaris [2] - Permaligam [#]
Tags : , , ,
Votatz per mon blòg sus se vos plai

Commentaires

Mandar un comentari