ITER, sota toei lei agachs de la region

En Provença, auvèm soventi fes parlar d'ITER. La magèr part dei gents sabon pas qu'es qu'ITER deu faire exactament, mai a una influença visibla sus lei païsatges, la circulacion rotièra, l'emplec dins la Provença tota, lo desvelopament e "l'amenatjament dau territòri" pròche Cadarache, etc. Aquò fa qu'es un subjècte qu'interessa certanament un molon de provençaus, e que justificariá largament l'escritura d'un article en occitan.

Fa tanben totjorn un pauc mau au còr de veire d'ecologista que mesclan ITER e EPR, descreditant lo moviment e balhant d'arguments a aquelei que vòlon assimilar ecologisme e crenta dau progrès.

Per aquelei rasons fa un moment qu'aviáu previst d'escrieure sus aquò, finda se es luenh de mon especialitat. En fach lo vau pas faire de seguida, mai li a quauquarren que ven de mi o faire pensar : veni de veire que li a una jornada especiala ITER a la feira enternacionala de Marselha. Se li en a que son interessats, es lo 30 setembre au pargue Chanòt, e vaqui lo programa.