Lo cube

Un pauc mai dificil que lo darrièr còp, mais botarai d'indicis a flor e mesura. Un cube d'un quilò es sus una taula, e son extremitat superiora es estacada a un fiu sus una carrèla, tirada per un pes de causir.

Quin pes causir per que lo cube si desplace sensa virar e tombar sus la faça avans ?

D'un biais mai clar la question es quau sarà lo coble totau au ponch O marquat en verd a man seneca. Cau adurre totei leis accions exterioras (lo pes, la reaccion de la taula, e la tirada de la còrda) en aquesto ponch O, qu'es lo centre d'un "efèt d'aigre". Se lo fiu tira pas tròp fòrt lo pes e/o la reaccion de la taula pòdan compensar lo coble produsit en O per la tirada dau fiu.

La question de la reaccion de la taula es un pauc complicada, finda sensa fretament. Pensi que poriáu balhar aquesto exerci a un estudiant de "mat sup". Mais li a un biais de lo rendre fòrça mai aisit : maginatz qu'es un pauc clinat (infinidament pauc), alora lo contact embé la taula si fa en un solet ponch, e la reaccion de la taula (en verd sus l'imatge) pòu pas produsir de coble en aquesto ponch (podetz pas dobrir una pòrta en quichant sus sei gonds). Basta comparar d'una man l'efèt dau pes (en violet) que fa virar lo cube en un sens a l'entorn dau ponch O, e de l'autra man l'efèt de la tirada dau fiu que fa virar lo cube dins l'autre sens. Aquò nos ditz se lo cube va tornar tombar sus sei pes o virar mai.

Se sentetz pas ço que passariá, podetz faire l'experiment dins la vida vertadièra. Prenetz per exemple una botelha d'aiga (perque es ço que li a davant iéu) embé a l'entorn de 50cl d'aiga, a mai o mens la fòrma d'un cube. Metetz la man au nivèu dau naut de l'aiga : tiretz plan-planet e la botelha resquila, tiretz mai fòrt e va virar.
Ara se metetz mai d'aiga es coma cambiar la fòrma dau cube e accentuar l'efèt de levièr, veiretz que la fòrça limita es aperaqui la mema quau-que-sigue lo nivèu d'aiga. Valent-a-dire que, a pes constant, la fòrça limita es proporcionala a la autura.

Comments

[Clapassier de NY]

Foguèt un problèm plan interessant.

Aquo me dessobta totjorn: per resòlguer de problèms de fisic, mon esperiença concreta m’ajuda pas. Pasmens ai tirat un fum de daquòsses dins ma vida !

[lo_julien]

Lo pes (veire l'imatge sus l'indici n°2) es repartit sus tot lo cube, mais aquò es coma si era aplicat tot en lo centre dau cube. Adonc per l'efèt d'aigre li a per lo pes un braç de levier de la mièja-longur dau cube. Mentre que per la tirada dau fiu li a un braç de levier de la longur dau cube. Embé un braç de levier doi fes pus grand, cau una força doi fes pu pichòta per aguer un meme coble. Donc basta botar un pes de 500g sus la carrèla per compensar lo coble dau pes.

- Embé mens de 500g sus la carrèla, lo cube resquilha o bolega pas brica (segon lo fretament).
- Embé mai de 500g sus la carrèla, lo cube vira

[lo_julien]

Vesi qu'as retengut lo còp de la leca qu'aviáu dreçat dins lo problèma de l'esquilhaire :-) Mais non, li a ges de leca d'aquesta mena aquí.

Per resumar lei question de friccion et de canton aquetat :
- Se li a ges de friccion : per un pes pichon sus la carrèla lo cube va resquilhar sus la taula, per un pes mai grand va virar sus son caire.
- Se li a un pauc de friccion : per un pes fòrça pichon lo cube si bolegarà pas brica, per un pes intermediari va resquilar, e per un pes grand virarà.
- Se li a fòrça friccion (o lo canton estacat, qu'es coma una friccion infinida) : per un pès pichon bolegarà pas, per une pes mai grand virarà.

Mais finda se li a tres regimes, lo pes limit en-delai dau quau lo cube vira es totjorn lo meme.

[Clapassier de NY]

Pensi que lo pes a pas d’emportança. Si i a pas res per aquetar lo cube dins son canton sud-èst, jamai tombarà per amor que i a pas de coble a aqueste canton.

Mas ne soi pas segur ...

[lo_julien]

Se vòles, mais en fach a ges d'influença, perque la friccion estent paralèla a la taula pòde pas produsir de coble sus un ponch empegat a la taula.

Iéu tanben m'eri pausat aquesta question, mais en fach es fòrça mai simple qu'aquò.